Joh 20 | MEK | STEP | Egani iifi kina amagai ipauma kina ae'agau koa kai, Maria Makdalena la elao. Ke elao laai aisama, kepo akaiki'a la ake kepae apua auga eelai eisa.

John 20

Iesu Emaunimue

(Mateo 28:1-10; Mako 16:1-8; Luka 24:1-12)

1 Egani iifi kina amagai ipauma kina ae'agau koa kai, Maria Makdalena la elao. Ke elao laai aisama, kepo akaiki'a la ake kepae apua auga eelai eisa. 2 Ega puo epiau elao Saimon Peto keoma auga, ke Iesu ega imoi i'oina aga'o Iesu anina eani alogaina auga auni'i epaini'i einaka, “Lopia laai keafilaisa kai kapai keogeisa auga alalogo,” eoma.

3 Ega puo Peto ke imoi ega'ina fou kekailai la kelao. 4 Auni'i kepiau kelao kai imoi ega'ina Peto epiau'egaina laai epealai kaukau. 5 Ke isa aiso mo la alogai eokoko maaga elao Iesu kemoka tiapu'i keka eisa'i kai, la alogai aekoko. 6 Ke Saimon Peto keoma auga isa muninai emai aisama la alogai ekoko. Isa Iesu kemoka tiapuga egae keka eisa'i. 7 Ke tiapu Iesu kania kemoka auga isafa afugai mo eka eisa. Kai ega'ina tiapuga auga ifo eofeisa me'egai eka, ke imaauga kemoka tiapuga auga i'oinagai eka eisa. 8 Ega aisama imoi eufai laai epealai auga isafa, Iesu eka laaga alogai ekoko. Ke isa eisa ke kapa'ina kemia au'i ma'oai epako'ani'i. 9 Kai Deo ega iifa pukagai eifa Iesu maeai femaunimue eoma auga iifaga kapa'ina eifania auga oko akelogo paisa. 10 Ke imoi ega'ina auni'i kemue afu'i kelao.

Iesu Maria Makdalena Eapakina Penia

(Mako 16:9-11)

11 Kai Maria Makdalena la afegai eapa eapepe. Ke maisapepega mo aiso la alogai eokoko. 12 Ega aisama agelo auni'i tiapu kelo'i kei'iuka'i au'i Iesu imaauga eka afugai, aga'o kania eka kaina ke aga'o ife eka kaina keagu eisa'i.

13 Ke agelo isa kepa'ani penia keinaka, “Papie, kapa puo loapepe?” keoma.

Ke isa einaka, “Lau e'u Lopia keafiia kai kapai keogeisa auga alalogo,” eoma. 14 Maria ega'ina eifania afegai e'afoaipini aisama, Iesu egae eapa eisa. Kai eisa aisama isa Iesu auga aelogo.

15 Ke Iesu eifa einaka, “Papie, kapa puo loapepe? Oi kaisau lokapuga?” eoma.

Ke Maria eopolaga Iesu auga au la alogai epinauga auga eoma puo epainia einaka, “Au akaiki'a aumu, oi isa imaauga loafiia lolaoaina koa, kapai loogeisa auga maauai moifania ega koa malao maafia laoma,” eoma.

16 Kai Iesu isa eifaga einaka, “Maria,” eoma.

Ega aisama Maria Iesu eaipenia kai Hibru malagai eifa einaka, “Raboni!” eoma. Ke eega elao gaafi opogaina eoma. (Raboni i'a mala'aisai auga Pamalele Aumu.)

17 Kai Iesu isa epainia einaka, “Lau Amau eega alalao koa puo foloafi opogainiau. Kai molao lau e'u imoi au'i ^{▼▼17 Grik malagai, ‘aau akiu’} fopaini'i foinaka, ‘Lau lamue Amau ke oi Amami eega lalao, ke lau e'u Deo ke oi emi Deo eega lalao fooma,’” eoma.

18 Ega puo Maria Makdalena Iesu ega imoi au'i ee'i elao, ke isa Lopia eisa auga maa'iai fouga eifania. Ke Lopia isa maagai kapa'ina eifania auga isafa Iesu ega imoi au'i maa'iai eifania.

Iesu Ega Imoi Eapakina Peni'i

(Mateo 28:16-20; Mako 16:14-18; Luka 24:36-49)

19 Ke iifi kina egapigapi alogai, Iesu ega imoi Iudea papiau'i kemani'iaini'i puo, e'a pa'afi'i kekupuni'i kai alogai kekaigugu keagu. Ega'ina alogai Iesu emai ago'iai eapafoki epaini'i einaka, “Gagao eemiai gaka,” eoma. 20 Ke ega'ina eifania afegai, ima ife ikoko afuga, ke mape iso afuga fou epakina'i. Ke Iesu ega imoi Lopia keisa aisama, alo'i egama alogaina.

21 Ega aisama Iesu eifa pugu einaka, “Gagao eemiai gaka! Lau Amau eulaisau koa i'opoga, oi isafa laulaimi,” eoma. 22 Ega'ina eifania afegai, alo mapuga isapuga eipilaisa epenii'i kai, epaini'i einaka, “Deo ega Spiritu amoafia alomiai gaagu. 23 Oi papiau laomai apala'i kekapai'i au'i ago'agegeaini'i koa aisama, Deo isafa isa e'i apala age'agegeaini'i. Kai isa laomai apala'i kekapai'i au'i afolo'agegeaini'i koa aisama, Deo isafa isa e'i apala afae'agegeaini'i,” eoma.

Iesu Tomas Eapakina Penia

24 Iesu ega imoi ma'oai eapakina peni'i alogai, apostolo au'i 12 au'i epo'iai aga'o aka Tomas kafela keoma auga maaga e'afu. 25 Ega puo Iesu ega imoi Lopia Iesu keisa auga fouga isa maagai keifania aisama, isa einaka, “Lau ikoko afuga isa imagai afalaisa, ke imauai ikoko afuga afalaafi opogaina, ke imau isa mapegai afalapakoko koa aisama, kapa'ina oifania auga afalapako'ania,” eoma.

26 Ke iifi aga'o elao afegai, Iesu ega imoi pa'afi kekupuni'i e'a alogai keagu pugu aisama, Tomas isafa egae fou keagu. Ke pa'afi kekupuni'i mo ganinagai Iesu emai epo'iai eapafoki ke epaini'i einaka, “Gagao eemiai gaka!” eoma. 27 Egae kai Tomas epainia einaka, “Imamu keke'e imauai mooge kai ikoko afuga moisa. Ke imamu mokalaisa mapeuai iso afugai mokaauka. Ke oi opomu gua folopamia kai mopako'ania,” eoma.

28 Ega aisama Tomas Iesu epainia einaka, “E'u Lopia, e'u Deo,” eoma.

29 Kai Iesu isa epainia einaka, “Oi lau loisau puo lopako'aniau kai kaisau lau aeisau kai epako'aniau auga Deo eegai kapa felo'i eafi'i,” eoma.

30 Iesu ega imoi ago'iai mirakulo gou'i i'oi'i ma'o ekapai'i kai, i'ina pukagai ipapua'i aemia. 31 Kai oi Iesu Mesaia ke Deo Gauga auga fopako'ania, ke ega'ina pako'agai agu pagai maunina foafia eoma kainai i'ina kapa'i ipapua'i emia.